252. De sancto Ianuario.

1 a. Christum laude celebri
sexus et aetas
invisibilem
omnis canat,

1 b. Hanc qui dieculam
nobis septenis
fecit testibus
celebrandam.

2 a. Quorum primus
electus Dei
Ianuarius
est pontifex.

2 b. Angelico

in vultu semper
Deo serviens
emicuit.

3 a. Hic poenas

sustinuit patiens

Sub principe

saevo Diocletiano

pro Christi

nomine plurimas,

ut hostis cruenti fauces

immunis

evaderet rabidas.

3 b. Libamen

cum sperneret idolis

Christi patris
athleta invictissimus
offerre,

carcerali poena
afficit insanus iudex
atrociter
martyrem Domini.

4 a. Mox inde ignito
traditus furno
ex Domini iussis et
sanus exiit.

4 b. His praeses agnitis
perfurens ira
iussit nervos scindere
militi Dei.

5 a. Post haec ad fidem Dei
incredulos
convertit populos
Timotheo oculos
reddit et claros.

5 b. Christus, volens martyri
certaminis
finem imponere,
decollari permisit
iunctis sociis.

6 a. Conregnant

nunc incliti martyres
in caelis cum Christo
Domino et eius
cunctis angelis.

6 b. O pie

Ianuari, precibus
nos Deo sedulis
commenda cum piis
tuis sociis.