253. In Natali Innocentum.

1 a. Alma fulgent omni mundo
Christi natalitia;

1 b. Bella cessant, quia pacis
nuntiantur gaudia.

2 a. Caeli Deum arta stringit
praesaepis angustia,

2 b. Decus nostrum redemptoris
reparat militia.

3 a. Exardescit contra illam
Herodis insania

3 b. Frustra verens, ne amittat
quassa regni solia.

4 a. Gestit ergo scire, quonam
lateat infantia,

4 b. Huius ei metus crebra
ingerens suspiria.

5 a. Inquirensque, nati regis
ubi sint palatia,

5 b. Kara Christo discit esse
Bethlehem dotalia.

6 a. Leto dare immortalem
Vitae parat largitorem
Maxima dementia.

6 b. Morti cedit recens natus
A parentibus delatus
In Aegypti munia.

7 a. Nec a magis se delusum
Rex iniquus fert inuitum
Furens ex invidia;

7 b. Omnes parvos iubet caedi,
Quotquot intra sunt reperti
Bethlehem confinia.

8 a. Praeciduntur abque noxa

A bimatu atque infra

Dextera sicaria.

8 b. Qui vix vita fruebantur
Necdum mortis merebantur
Fera tam dispendia.

9a. Xristi testes non loquendo,
Hunc praecedunt moriendo
Caeli ad fastigia.

9 b. Ymnum ergo praesens turba

Dulci canat symphonia

Tanta pro laetitia,

10 a. Culpa poscens ut deleta
Pura innocentia

10 b. Innocentum praestet nobis
Vera Christus gaudia.