256. In Decollatione s. Iohannis Bapt.

1 a. Ecclesia
devota
inclita
concinat cantica,

1b. Sacra quia
rutilant
nunc festa
per orbis spatia.

2 a. Laeta dies instat
et magna,
gaudeat cuncta
dominica caterva,

2 b. Quia de Iohanne
Baptista

iam nunc intonant
praeconia dulcia.

3 a. Cuius martyrii
gloria

claret maxima
laude pia
hac in aula
prodita,

3 b. De qua praeconia
inclita

Christum Dominum
laudantia
per saecula
sunt orta.

4 a. Patri virtute prima
reddidit famina,
loca postea
petit eremitica.

4 b. Illic inter spelaea
arta cluens vita
carni tegmina
circumdat aspera.

5 a. Arva planabat devia

voce conclamans prophetica,
baptizabat corpora,
remedia
praedicans futura.

5 b. Monstrabat Christum interea,
cuius clara rutilant dona,
quibus aeternae vitae
consequimur
magna praemia.

6 a. Baptismi sacra
perfudit unda
lavantem crimina;

6 b. Testimonia
de caelo data
prodit in saecula.

7 a. Tanta post magna
merita

sumit almam
capitis sententiam.

7 b. Cuius exempla
secuta
quam beata
sanctorum sunt agmina!

8 a. Aeterna gloria
laureatus regnat
in aethra,

8 b. Omnium merita

qui transscendit summa
gratia.

9 a. Hic itaque magnifica
sublimatus est doxa
supra altithrona
sedilia
in caeli curia,

9 b. Qua reboant sublimia
trinitatem
cernentia
in gloria
aeterna agmina.

10 a. Omnia mala perpetrata
ac futura avertat
baptista

10b. Et bona sanctus prece summa
impetret aeterne
. . . .