263. De sancta Katharina.

1 a. Summo regi iubilemus
dulci cum psallentio;

1 b. Katharina in hac die
nupsit Dei filio.

2 a. Trucidantis sprevit minas
freta Christi dextera,

2 b. Propter fidem salvatoris
dira tulit verbera.

3 a. Saevit hostis, ut negaret
Christum Dei filium,

3 b. Laniari membra iubet
usque ad exitium.

4 a. Argumenta tormentorum
inquirit et genera,

4 b. Nequit flecti virgo sacra
spe tendens ad supera.

5 a. Ut granum tritici
teritur

5 b. Nec de verberibus
queritur.

6 a. Flagrat hinc et saevit hostis,
blandimentis utitur,

6 b. Sed nec ita virgo verax
ad negandum ducitur.

7 a. Vapulat haec graviter,

7 b. Sustinet viriliter.

8 a. Spernit ictus ferientum
laetatur conviciis,

8 b. Quidquid suffert propter
Christum,
pensat pro divitiis.

9 a. In hac die Katharina
coronari meruit

9 b. Crucem tollens, Christum
sequens,
sicut ipse docuit.

10 a. Sol in die, luna nocte

non hanc uret amplius,

10 b. Neque luctus neque clamor
continget ulterius.

11a. Poscat ergo salvatorem
suis sanctis precibus,

11 b. Ut cum illa collocemur
in supernis sedibus.