264. De sancta Katharina.

1 a. Laudes Deo persolvamus
Et in ipso gaudeamus,
Qui creavit omnia;

1b. Alternando concrepemus,
Concrepando decantemus
Virginis magnalia.

2 a. Virgo sancta Katharina
Regali progenie
Fulget orta,
Cui porta

Caeli patet hodie.

2 b. Quae dum vixit in hoc mundo
Legibus iustitiae,
Se submisit,
Cum derisit

Cultum idolatriae.

3 a. Nec metuit minas mortis,
Dum tyrannum arguit,
Sed secura
Virgo pura

Tormenta sustinuit.

3 b. Quae devictis rhetoribus
Carceris custodia
Detruditur,
Sed fruitur
Angelorum curia.

4 a. Virgis caesa
Neque laesa
Per tormenta
Sunt cruenta

Membra nimis tenera;

4 b. Tenta fastu
Sine pastu
Impinguatur,
Cum turbatur

Caesaris mens misera.

5 a, Ut rotarum
Diversarum
Plebis nece
Sua prece
Dissipatur machina.

5 b. Quod precatur,
Illi datur,
Capitali
Post finali

Plectitur sententia.

6 a. Sexta die coronatur,

In qua Christus exaltatur
Ad se trahens omnia,

6 b. Ut eadem sine mora

Ferrum lictor mergit hora
Diei tunc tertia.

7 a. Sponsa sponso copulatur
Miro sic consortio,

Quod amborum

Iungit thorum
Terminata passio.

7 b. Sponsi laeva mundo tenta
Virginis sub capite

Modo dextra

Sub et extra

Sponsam ornat inclite.

8 a. Sponsa sibi coronatur
Rosis atque liliis
Rubicunda,
Tota munda,

Castis casta brachiis.

8 b. Contemplantur hanc beatam

Ierusalem filiae
Concinentes
Et stupentes

Virginis in specie.

9 a. Cuius corpus pretiosum
Ad sepulcrum gloriosum
Defertur ab angelis,

9 b. Et Sinai mons ditatur
Hoc thesauro, quo frustratur
Urbs cruenta funeris.

10 a. Ibi tumba contra morem
Fundit olei liquorem
Sanans infirmantia.

10 b. Vita, finis, mira signa

Sat testantur, quam sit digna
Dies haee memoria.

11a. Fulget dies haec praeclara.
In qua virgo Deo cara
Triumphat in gloria.

11b. Katharina, sacra virgo,

Nos in huius mundi pyrgo
Christo reconcilia,

12. Gloriemur et laetemur
Tecum ut in gloria.