265. De sancto Laurentio.

1 a. Laurentium venerari
Debet, quisque laureari
Vult caelesti laurea:

1b. Qui pro dicta veritate
A tyrannis est in crate
Coassatus ferrea.

2 a. Hic, dum Sixtus ducebatur
Ad mortem, hunc sequebatur
Avidus martyrii.

2 b. Tandem laetus accusatur
Pro thesauris et ligatur
De mandato Decii.

3 a. Extorquere quod intendit,
In pauperes iam expendit
Beatas Laurentius.

3 b. In carcere baptizatur
Lucilus, et illustratur
Intus et exterius.

4 a. Hippolytum baptizavit,
Baptizato demonstravit
Choros triumphantium.

4 b. Ad tormenta revocavit,
Nudum dire fustigavit
Decius Laurentium.

5 a. Tunc Romano revelatur
Christus, a quo tergebatur
Sancti cruor profluens ;

5 b. Qui mox tentus decollatur,
Martyrio decoratur
Diffiteri renuens.

6 a. Laurentius iam assatur,
A quo Caesar invitatur
Ad assati latera;

6 b. Satis, inquit, est assatum
Iam hoc ede praeparatum,
Pars gyretur altera.

7 a. Tota nocte sic duravit
Supra cratem, exspiravit
Migrans ad caelestia.

7 b. Cuius intercessione
Fortes in confessione
Stemus digni gloria.