275. De sancta Margareta.

1 a. Laus tibi, Christe,
fili Dei unigenite,

1b. Cum patre qui regnas
in unitate paracliti.

2 a. Quem agnum sequuntur
agmina virginum,
quocunque ierit,

2 b. Nomen tuum et patris
in suis frontibus
scriptum habentia.

3 a. Inter quas haec virgo candet
virginitatis lilio

3 b. Et rubet roseo vultu,
rubicunda martyrio.

4 a. Nomen cuius
ab evangelica
tractum est margarita,

4 b. Quam inventam
venditis omnibus
emit negotiator.

5 a. Haec tua, Christe, speciosa
tecum delectatur
in hortis aromatum:

5 b. Haec tuum ingressa thalamum
tuae visionis
gratia iucundatur.

6 a. Quam pro nostris excessibus
apud te semper
intercedere poscimus,

6 b. Ut mundati criminibus
aeternam mortem
praevenire possimus.

7 a. Ut ipsa duce praevia
vestibus in albis
te mereamur sequi
per portam aeternalem,

7 b. Ut illuc eius merita
nos levent ad alta,
quos nostra mala trahunt
ad portam infernalem.

8 a. Ergo, Christe, rex aeternae
gloriae,

memor in nobis
tuae sis Margaretae,

8 b. In cuius iucunditatis
gaudio

caelestis aulae
concinunt symphoniae:

9. Laus tibi, Christe Domine.