278. De sancta Margareta.

1a. Veneretur unitas,
Collaudetur trinitas
Pari reverentia,

1 b. Deus trinus in personis,
Mirae tamen rationis
Unus in essentia.

2 a. Qui caelestis gloriae
Margaretam hodie
Duxit ad palatium:

2 b. In tormentis virgini
Paranymphus Domini
Praebuit solacium.

3 a. Vana mundi respuit,
Christum solum coluit
Virgo prudentissima:

3 b. Signis cum virtutibus
Ac diversis laudibus
Claruit sanctissima.

4 a. Ista virgo stabilis
Et nunquam mutabilis
Ligavit daemonium.

4 b. Casta mori voluit,
Hinc tyrannus doluit,
Sprevit matrimonium.

5 a. Virgo benignissima,
Virgoque dulcissima,
Vernans quasi lilium,

5 b. Iugiter pro populo

Degenti (iam) in saeculo
Roga Dei filium.

6. Amen dicant omnia.