286. De sancto Mauritio.

1 a. Harmonia musicorum
Perdulcia canticorum
Prodat modulamina,

1 b. Ducis pii Thebaeorum
Mauritii et suorum
Collaudans certamina.

2 a. Hic Thebaeae regionis
Dux rubeae legionis
Deduxit exercitum

2 b. Per vim dirae passionis
Ad futurae visionis
Dei laetum transitum.

3 a. A patria convocantur,
Ad impia provocantur
A Maximiano,

3 b. Nec a piis revocantur
Nec impiis implicantur
Edicto profano.

4 a. Christianos se testantur
Et profanos detestantur
Cultus idolatriae,

4 b. Hortantur et confortantur,
Animantur et armantur
Virtute constantiae.

5 a. Maximianus turbatur
His insanus, decollatur
Legionis decimus;

5 b. Furor eius iteratur

Agens peius, augmentatur
Sanctis ardor intimus.

6 a. Arma legio deponit,
Caput gladio supponit,
Decollatur pariter.

6 b. Animas caelo reponit
Deus, coronas imponit,
Et regnant feliciter.

7 a. Felix situs Agaunensis,
Fluctus citus Rhodanensis
Sacro fluens sanguine ;

7 b. Urbs beata Viennensis,
Ducis ditata Thebensis
Capitis munimine.

8 a. Sancti fractis corpusculis

Fulgent factis miraculis,

Faber punitur nocuus,

8 b. Salvant ab orbis vinculis,
Plagis, morbis, periculis,
Matri decantat mortuus.

9 a. Ad istorum instantiam
Peccatorum det veniam
Nobis rex angelorum

9 b. Et septiformem gratiam
Et deiformem gloriam
Per saecula saeculorum.