293. De sancto Narcisso.

1 a. Fidelis turba Christi
de martyris victoria

1b. Narcissi collaetetur,
qui vicit hostis proelia.

2 a. Legem fidei,

per quam novit verbum Dei,
docens cum gratia

2 b. Convertit Afram,

idolatram, fide iustam
ab iniustitia.

3 a. O quam fortis dilectio
et invicta constantia!

3 b. Quam praeclara confessio,
quam iusta patientia!

4 a. Per Narcissum Afra
conversa
subit gaudens martyria.

4b. Docturus properat
Gerundam
martyr, cuius sollemnia

5 a. Per mundum hodie
colit ecclesia

5 b. Commendans meritum
laeta de gloria.

6 a. Vitae novae fructum
dant evangelia,

6 b. Quem praedicat iustus
cum fiducia.

7 a. Ergo preces nostras
eius clementia

7 b. Deo repraesentet
data venia.

8a. Cuius virtutum merita
colunt, laudant
humana et caelestia.

8 b. Ante conspectum Domini
nos adiuvent
illius suffragia.

9. Laus, honor regi,
qui regit omnia.