298. De sancto Nicolao.

1 a. Confessorum summo regi,
Qui dispensat suo gregi,
Honor sit et gloria,

1b. Cuius amor uterinum

Cultum trahit ad divinum
Infra matris ubera,

2 a. Nicolao dum lactenti,
Matris suae lac spernenti,
Cibus ipse Christus est,

2 b. Puerilis cuius aetas
Ad senilis aevi metas
Docet, quis et quantus est.

3 a. Ecce, supererogat

Abstinens infantulus
A licitis uberibus,

3 b. Dum lactare derogat,
Nectare mellifluo
Reficitur divinitus,

4 a. Nicolae, flos pastorum,
Consolator contritorum,
Respice miserias,

4 b. Quibus mundo laboramus,
Fac, ut per te transeamus
Sedes ad Elyseas.