303. De sancto Norberto.

1 a. Aeterni regis munera
Celebret candida turba,

1 b. Festos dies sanctificet
Mundetque pectoris ima.

2 a. Sanctorumque memoria
Sit illi vitae nuntia,

2 b. Quorum mores et doctrina
Digna merentur praemia.

3 a. Inter quos pater Norbertus
Certa donatus gloria,

3 b. Quam accepit cum beatis
Propter laborum merita.

4 a. Felix illa Teutonica,

Quae tantum virum enixa,
Qui recta fuit posteris
Vitae degendae formula.

4 b. Quem qui sequuntur clerici,
Praesules et canonici
Aeterna vita fruentur
Sacro iuvante numine.

5 a. Spirat illi numen sanctum,
Induat ut corpusculum
Veste nive praelucida
Religionis figura,

5 b. Praemonstratum ut teneret
Ibique templum dicaret
Deo eiusque baptistae,
Fratres sibi sociaret.

6 a. Paret statim vir beatus
Mira plenus solertia

6 b. Eius, qui novit secreta,
Assistente potentia.

7 a. Nos agones et labores,
Quos suscepit Christi miles,
Recolamus nunc alacres
Eius sequentes limina.

7 b. Verbum Dei seminatur,
Miraculis confirmatur,
Haeretici convincuntur
Norberti diligentia.

8 a. Cuius laudum praeconia
Meditatur ecclesia,

8 b. Cum fratribus recensentur
Parentis natalitia.

9 a. Fide clarus et doctrina
Praesul ornatur laurea,

9 b. Dei plenus potentia
Mira perfecit opera.

10 a. Daemoniorum scommata
Fugat atque latibula

10 b. Solertique prudentia
Mundi vicit pericula.

11a. Cuius carorum copia
Exornatur ecclesia,

11b. Eorumque disciplina
Decoratur monastica.

12 a. Huius sequamur limina
Imitemurque dogmata,

12 b. Ut in caelesti regia
Decantemus Alleluia.