305. In Festo Patronorum
Hildesheimensium.

1 a. Laetis voce, chordis, ore
Nostrum spiritus fervore
Melos tangat aethera,

1 b. Ymnum Deo concinamus,
Magnalia recolamus
Patronorum vetera.

2 a. Pia, clemens, dulcis, bona,
Maria, virgo, patrona
Huius templi Domini,

2b. Parens casta manens Christi,

Verbo carnem tribuisti

Virginalem homini.

3 a. Orbis duces Petre, Paule,
Incolae caelestis aulae,
Iudicantes saeculum,

3 b. Lucis aulam possidere
Facite nos et videre
Trinitatis speculum.

4 a. Digni Cosma, Damiane,
Tiburti, Valeriane,
Martyres eximii,

4b. Vitam corporis sprevistis,
In mortem vos tradidistis
Aeterni spe praemii.

5 a. Sancti Iuste Arthemique,
Canciani, nos utique
Precibus defendite,

5 b. Supplicate, Godeharde,
Epiphani et Bernwarde,
Salutem impendite.

6 a. Tuere nos, Speciosa,
Cum Caecilia, Generosa,
Virgines almificae,

6 b. Enodati culpis, poenis,
Caeli gaudiis ut amoenis
Laetemur deifice.

7 a. Imitemur hos autores,
Mundi spernamus favores
Cum Oswaldo fortiter,

7 b. Nobis ut ex agni throno
Detur in caelesti domo
Merces aeternaliter.

8 a. Benigna virgo Maria,
Petre, Paule, prece pia,
Confessores, virgines,

8 b. Electi martyres Christi,
Nos orate tandem sisti
Supra caeli cardinis

9 a. Regna nobis impetrate
Beata felicitate,

Precamur suppliciter,

9 b. Gloria fruitionis
Facialis visionis
Dotemur feliciter.