312. De sancto Petro.

1. Principem

2 a. Apostolorum
dulce canora
resonet vox
diatonica, quem vox
caelica
laudat et angelica.

2 b. Super quem mater
ecclesia stat
firmissima,
nec inferni ianua
valet nec
mortis violentia.

3 a. In Galilaea
per maris spatia

3 b. Hic cum Andrea
dum trahit retia,

4 a. Trahit illum
Iesu clementia,
Petrum nominat
firma gratia,

4 b. Tradit illi

claves, caelestia
clemens ianitor
pandat ostia.

5 a. Hic est, qui nocte media
ambulat super maria,

5 b. Per quem Christus insignia
mundo dedit prodigia.

6 a. In urbe Ierosolyma
ad speciosa limina

6 b. Longo situ debilia
firmat claudo vestigia

7 a. Ad membra paralytica
Aeneae vox est medica.

7 b. Tabitam reddit viduis
in virtute deifica.

8 a. Et saluti fugit omnis
valetudo contraria,

8 b. Et languori redit omnis
valetudo contraria.

9 a. Cornelius renascitur
deitate propitia,

9 b. Ananiam cum Saphira
necat fraudis nequitia.

10 a. Alas Simonis dissipat,

magum mergit in tartara,

10 b. Ipse de crucis gloria

triumphans intrat aethera.

11. Trinitati

sit laus aeterna.