314. De ss. Petro et Paulo.

1. Gaudet chorus electorum
Ad festiva beatorum
Petri, Pauli gloriam,

2 a. Quos pastores et doctores
Ordinavit et sacravit
Christus in ecclesia.

2 b. Qui dignatus est vocare,
Dum transiret secus mare,
Petrum ad hanc gratiam.

3 a. Rebus suis iam exutus

Christum pauper est secutus
Spretis, quae possederat,

3 b. Videt Christum, verbum Dei,
Caeli claves dantur ei,
Per quas caelos reserat.

4 a. A Christo prosternitur
Saulus, quem prosequitur,
Caius membra laniat,

4 b. Iustum lapidantibus
Favit, quorum vestibus
Datur, ut custodiat.

5 a. Stephanus, dum lapidatur,
Tunc pro Saulo deprecatur
Iesum flexis genibus.

5 b. De lupo factus est agnus
Et de Saulo doctor magnus
Viri iusti precibus.

6 a. Unus ligat atque solvit

Melius, quam mens revolvit,
Potestate tradita,

6 b. Perituri sunt ligandi,
Sunt solvendi coronandi,
Sed secundum merita.

7 a. Alter vero, vas honoris,
Semitas damnat erroris
Docens evangelium,

7 b. Ad culturam deitatis
Per doctrinam veritatis
Traxit Dionysium.

8 a. Petrus in excessu mentis
Vas submissum ligamentis
In figura gentium

8 b. Videns vidit et agnovit,
Quod Deus ad fidem movit
Gentilem Cornelium.

9 a. Caelos tranat, unde manat
Fons salutis, lux virtutis,
Dei sapientia,

9 b. Et arcana verba sana

Paulus audit, quorum claudit
Signata mysteria.

10 a. Ananias et Saphira,

Super quos ascendit ira
Irremediabilis,

10 b. Mentiri Deo conantur

Et per Petrum morti dantur,
Res est admirabilis.

11a. Paulus ante persecutor,
Nunc est sponsae Christi

tutor,
Cuius sanctus est adiutor
Spiritus scientiae,

11b. Fidem Christi dum revelat,
Cuius sponsae caste zelat,
Narrat hoc, quod ante celat,
Filiis ecclesiae.

12 a. Primatum sanctae cohortis
Petrus habet fide fortis,
Pro cuius amore mortis
Non timet pericula.

12 b. Porta Sion exaltata

Super Petrum est fundata,
Super omnia amata
Iacob tabernacula.

13 a. Paulus ense decollatur,
Petrus cruce coronatur ;
Hi gubernant urbem lucis,
Cuius porta signum crucis,
Duo luminaria.

13 b. Istos, fratres, honoremus,
Ut excusent, quod timemus,
Per quos Roma gloriatur,
Et Romana gubernatur
Per orbem ecclesia.