319. In s. Petri ad Vincula.

1 a. Cor devotum, vox sonora
Promant laudes sine mora
Petri, summi praesulis,

1 b. Memorando, quid sit gestum,

Quare fiat istud festum

Pro ipsius vinculis.

2 a. Dux Quirinus gutturnosam
Natam habuit formosam,
Quae, Balbina nomine,

2 b. Saepissime veniebat

Ad carcerem et lambebat
Pro sui salvamine

3 a. Alexandri papae dura
Vincla, quibus omni cura
Vinctus erat carcere.

3 b. Quam dulciter removebat
Et catenas admonebat
Sancti Petri quaerere,

4 a. Quibus tactis sanitatem

Et integram sospitatem

Possit mox recipere.

4 b. Quae adcurrens nuntiavit
Patri, qui mox destinavit
Nuntium has quaerere

5 a. Solymam. Quas osculata
Postquam fuit, est sanata
Pulso morbi pondere.

5 b. Ob hoc festum celebrari
Papa iussit et servari
Eductus de carcere.

6 a. Ergo Petro supplicemus
Et devote flagitemus,
Ut dissolvat vincula

6 b. Peccatorum et purgatos
Excipiat et mundatos
In caeli cenacula.