324. In Translatione s. Remigii.

1 a. Magnus Deus omnium,
Qui se suis praemium
Contulit in gloria,

1 b. Cum iam post exsilium,
Post carnis hospitium
Potiuntur patria.

2 a. Cuius dispositio
Potenti consilio
Sic dictavit omnia,

2 b. Ut in rerum corpore
Quaedam suo tempore
Servaret magnalia.

3 a. Quarum rerum novitas
Fit mira suavitas
Praegustanti talia.

3 b. Quia sic accenditur
Et in eum rapitur,
Qui dat certa gaudia.

4 a. Ad haec praegustamina
Dedit Deus limina,
Ne sequendo devia
Erremus a patria.

4 b. Et contra naufragium
Produxit Remigium,
In cuius praesentia
Nemo timet maria.

5 a. Quo parentum senescentum
Revirescunt et florescunt
Effeta plantaria,

5 b. Et dat florem praeter morem
Hiemalis, non vernalis
Aetas et materia.

6 a. Huius cura a cultura

Nefandorum idolorum

Respiravit Francia,

6 b. De qua culta messis multa
Recondenda, non urenda
Crevit in ecclesia.

7 a. Huius actus enarrare
Est arenas numerare,
Quorum cum Dei gratia
Immensa fuit copia.

7 b. Sed credentes eum vere
Veris bonis inhaerere
Per illius suffragia
Confidamus de venia.

8 a. O Remigi, lux Francorum,
Audi preces famulorum,
Audi fletus,
Solve metus,

Remove poenalia.

8 b. Ut id per te mereamur,
Quo te frui gratulamur,
Ubi fructu
Sine luctu

Pascamur et gloria.

9. Ad haec vera gaudia
Nos conducat gratia.