334. De sancto Stephano.

1a. Ecce, martyr primitivus,
In quo salit redivivus
Veri fons martyrii;

1 b. Hic athleta sternit hostes
Et cruore primus postes
Signat sanctuarii.

2 a. Cuius sanguis est caementum
Et primaevum fundamentum
Nascentis ecclesiae,

2 b. Dum a suis lapidatur,
Ipsi caelum reseratur
Et tribunal gloriae.

3 a. Inter ictus stat invictus,
Deum orat et implorat
Inimicis veniam.

3 b. Pro Saulo tunc exauditur,
Unde Paulus accersitur
Ad aeternam gloriam.

4 a. Mortes, morbos, pestes pellit,
Aspernatur et refellit
Iudaeorum iacula,

4 b. Laurentius amplexatur

Hunc, pro quo resuscitatur
Ustus in craticula.

5 a. Iesu viso dormit laetus,
Visa luce statim fretus,
Stephanus iam inclitus

5 b. Nos ex sua passione
Et tam sancta visione
Illustret divinitus.