335. De sancto Stephano.

1 a. Laetabundus

Resultet Stephano chorus
Alleluia,

1 b. Qui post Christum

Primus mundum vicit istum ;
Res miranda!

2 a. Crucis regnum docuit,
In quo primo splenduit
Sol de stella,

2 b. Christo miles iubilat,
Mundo stella rutilat
Semper clara.

3 a. Quem Iudaei rapiunt,
Eius mortem sitiunt
Pari forma,

3 b. Neque virtus vitio,
Neque mens martyrio
Fit corrupta.

4 a. Extra muros mittitur,

Lapidatus moritur

Valle nostra,

4 b. Bestiis exponitur
Nec ab illis laeditur
Carne sumpta.

5 a. Isaias cecinit,

Quod Stephanus meminit,
Nec Iudaea desinit
Esse caeca,

5 b. Si non suis vatibus
Credat vel martyribus,
Novae legis testibus,
Haec praedicta.

6 a. Caeli hierarchia
Fulget in gloria,
Quem lapidasti,
gens misera.

6 b. O martyr, propera
Et nos confoedera
Huic, quem genuit
puerpera.