338. De sancta Tancha.

1 a. Ad aeterni regis laudem
Emittamus cordis vocem,
Iubilando ac psallendo
Laudes demus summo Deo,

1 b. In electis qui triumphat
Et vicentes mundum ditat,
Ore mellifluo vocat
Et in caelis secum locat,

2 a. Viros atque feminas
Puellasque teneras
Cum supernis sociat.

2 b. De quorum sacro numero
Virginitatis titulo
Erat et collegio

3 a. Illustris, sanctissima,
Insignis sancta Tancha,
Martyriique gloria
Et suo nomine digna.

3 b. Quasi quaedam pretiosa
Dei fulget virgo pura,
Velut stella matutina
Lucet haec inter sidera.

4 a. O decus Campaniae,
Fidelium progenie
Orta, de spinis roseus
Flos procedens pulcherrimus.

4 b. O sancta Tancha splendida,
Quae sanctitatis gratia
Pertulisti immania
In corpore supplicia !

5 a. Te ad incestum flectere
Verbis nequit nec verbere
Puer saevus et impius,
Carnifex iniquissimus.

5 b. Tu triumphasti daemonem
Conservando castitatem,
Exsuperando rabiem
Vesanam et tyrannidem.

6 a. Tu viva Christi hostia,
Virgo Tancha sanctissima,
O martyr constantissima,
Electa ab infantia.

6 b. Tua nobis sit passio
Peccatorum purgatio,
Tua commemoratio
Sit mentis reparatio.