339. De gg. Thimotheo et Apollinare.

1 a. Ad honorem summi Dei
De triumpho Timothei
Gaudeat ecclesia:

1b. Gaude, Remis illustrata,
Gaude, Remis exaltata,
De sancti victoria.

2 a. Per hunc lumen recepisti,
Per hunc credens reliquisti
Daemonum contagia,

2 b. Per hunc hostis triumphatur,
Per hunc a te effugatur
Daemonum perfidia.

3 a. Martyr crucem praedicabat,
Miles ducem exaltabat
Unum super omnia,

3 b. Mente fixus erat cruci,
Voto praesentatur duci
Haud segnis ad proelia.

4 a. Maurus et Appollinaris
Affirmabant pro amaris
Commutari dulcia,

4 b. Quod pro damno terrenorum
Repensaret rex caelorum
Sempiterna gaudia.

5 a. Unde multos convertebant,
Et sic pedem referebant
A cultura devia,

5 b. Sed conversi decollantur,

Decollati munerantur

In caelesti curia.

6 a. Lampadius inflammatur,
Thimotheum exsecratur
Hostilis insanias

6 b. Hic promittit et minatur,
Ille spernit et causatur
Tam laeta quam tristia.

7 a. Hunc torquere tortor audet,
Sed torqueri martyr gaudet
Ab eius iniuria;

7 b. Quanto magis hic pulsabat,

Tanto magis ille stabat

Firmus Dei gratia.

8 a. Hic Neronis caput iurat,
Ille Christi, neque curat,
Quid possint inania,

8 b. Quid Apollo, quid Diana,
Quidve Nero; cuncta vana
Plenaque fallacia.

9 a. Supra petram firmat firmam,
Non tenebit rem infirmam
Martyris constantia,

9 b. Qui divinis intendebat,
Cui sollers assistebat
Angeli praesentia.

10 a. Demum sancti carcerantur,
Carcerati revocantur
Ad mortis stipendia,

10 b. Gladiantur revocati,
Sed procedunt gladiati
Ad caeli palatia.

11a. Ubi nec mors neque luctus,
Neque clamor neque metus,
Nec ulla miseria,

11b. Ubi summae trinitati,
Ubi verae unitati

Laus, honor et gloria.