340. De sancto Thoma.

1 a. Fidelium turma
congaudeat hodie

1 b. Celebrantes festum
sancti apostoli Thomae.

2 a. Post ascensionem
Domini Iesu Christi
in caelum

2 b. Iussum est ei

evangelizare sanctum
Dei verbum.

3 a. Cum esset in Caesarea,
civitate magna,

3 b. Apparuit ei dicens

Iesus Christus haec verba :

4 a. Vade praedicare
in Indiam,
et ibi te non derelinquam.

4 b. Exinde cum corona
martyrii
venies meam ad gloriam.

5 a. Qui veniens (in) civitatem
Andronopolim
invitatus est a rege
Gundophoro,

5 b. Ut veniret ad nuptias
et pranderet
cum [rege] aliisque in
palatio.

6 a. Qui convivans cum aliis
vidit inter cetera

6b. Quandam Hebraeam puellam
cantantem cithara:

7 a. Unus est Deus

Hebraeorum, qui creavit
maria.

7 b. Libenter sanctus

Thomas audiebat haec
cantica.

8 a. Quem intuens pincerna
percussit in faciem,

8 b. Thomas autem in eum
maledixit hunc sermonem:

9 a. In praesenti saeculo
tibi poena reddatur,

9 b. In futuro iudicio
tibi dimittatur.

10 a. Qui veniens ad fontem
invenit
quendam leonem,

10 b. Qui leo cecidit eum
et bibit
eius sanguinem.

11a. Cumque hoc rex audivit,
cunctis convivantibus dixit:

11b. Servus meus hac die
est devoratus a leone ;

12 a. Fuit autem

maledictio super eum,
non benedictio.

12 b. Interea

cantatrix puella Hebraea
omnibus dixit:

13 a. Rogate hunc apostolum,
quem pincerna
in faciem percussit,

13 b. Et dedit maledictionem,
praestet ipse
[ut] resurrectionem.

14 a. Quo audito

Thomas apostolus dixit
ad iuvenem:

14 b. Iesus Christus

te resuscitet meam per
orationem.

15 a. Tunc resuscitato iuvene
fudit super nubentes
suam benedictionem.

15 b. Per unum annum integrum
visitavit illam
totamque regionem.

16 a. Ac deinde in una
die baptizavit
virorum novem milia

16 b. Exceptis parvulis
ac mulieribus,
sicut refert scriptura.

17 a. Postea in alia
civitate
Gath iuvenem
fratrem regis suscitavit,

17 b. Per quattuor dies
[qui] mortuus
fuerat et
[Iesu] Christo militavit.

18 a. Deinde

profectus est ad Indiam
superiorem

18 b. Ibique

coepit praedicare quoque
Misdeum regem.

19 a. Qui nolens accipere
suam sanctam
predicationem

19 b. Contra dicebat ei,
adoraret
ut in templo solem.

20 a. Ipse autem adorabat
Dominum Deum
Iesum Christum:

20 b. Cumque cognoscerent eum
esse apostolum,
occiderunt in templum.

21 a. At ille gaudens
et gratias agens
migravit ad Christum.

21 b. Cum quo regnemus
omnes feliciter
semper in aeternum.