344. De sancta Ursula.

1 a. Adest dies celebris,
Quo de mundi tenebris
Nova lux emicuit,

1 b. Ursula cum milibus
Undenis virginibus
Novo more floruit.

2 a. Quae laesurae nesciae,
Dono, ductu gratiae,
Mente, votis, usibus

2 b. Normae sapientiae
Haerent, regi gloriae,
Refertae virtutibus.

3 a. Puritas, virginitas,
Vitae morum veritas
Fructusque martyrii,

3 b. Fides, spes et caritas
Ducit, ubi veritas
Dat coronas praemii.

4 a. Nil in mundo praeter mundum
Iesum amant,purum, mundum,
Iam cives in aethere.

4 b. Harum homo non de terris,
Mors et vita est de caelis
Verbo, corde, opere.

5 a. Tantis virtutum meritis,
Tantis donorum praemiis,
Hostis, carnis et saeculi

5 b. Fraudis spretis illecebris,
Poenis, minis, blanditiis,
Pugna vincunt mirabili.

6 a. Sic finitur transactio,
Datur in caelis mansio,
Ut sempiterno munere

6 b. Iungantur Dei filio,

Quem tenent sine termino
Sponsum perenni foedere.

7 a. O virginalis puritas,

Quam vitae dotat dignitas,
Beat, coronat deitas;

7 b. Nos trahat vestra caritas,
Regat, perducat pietas,
Quo iugis viget claritas.

8 a. Genetrix, iure primula,
Exemplum, norma, regula
Pure, caste viventium,

8 b. Tu nos emenda regula,
Confirma prece sedula,
Da, virgo, tuum filium.

9. Christe Iesu, amor,
corona sponsae,
dulcedo virginum.