349. De sanctis Apostolis.

1 a. Psalle Christo laude, prece
In apostolorum nece,
Qui plantant ecclesiam,

1 b. Nunc exemplis, nunc doctrina,
Nunc cruore ; per haec trina
Praebent nobis gratiam.

2 a. Petrum, Paulum et Andream
Per Neronem et Aegeam
Roma, Patras perimit ;

2 b. Qui tres gemmae sunt caelestes,
Quorum sanctitatis testes
Signa sunt eximia.

3 a. Herodes, gens pharisaea
Iacobis et in Iudaea
Binis vitam adimit,

3 b. Horum minor frater Dei,
Maior sociatur ei
Meritis et gratia,

4 a. Iohannes virgo beatus
Est in Epheso translatus
Ad Christi convivia,

4 b. Qui divina contemplatur,
Quo ex haustu alta fatur
Summae sapientiae.

5 a. Mauri trucidant Matthaeum,
Et Indi Bartholomaeum,
Et Philippum Scythia,

5 b. Thomam Indi, Iudam Persae
Simonemque; sic super se
Penetrant caelestia.

6 a. Horum prece placa natum,
Sana vulnus et reatum,
Ne labamur in peccatum,
Mater Iesu, sic placatum
Redde prece sedula.

6 b. Per hos, Iesu tolle mala,
Detur evolandi ala,
Qua volantes fide recta,
Caritate, spe perfecta
Ad aeterna gaudia.