350. De ss. Apostolis et Evangelistis.

1 a. In caelesti hierarchia
Sonat dulcis melodia,
Psallit vox angelica,

1b. Chorus omnium sanctorum
Laudibus apostolorum
Cantat laeta cantica.

2 a. Verbum Dei incarnatum
Clamant mundo esse natum
Et probant miraculis,

2 b. Idolatria turbatur,

Contra Christum inflammatur
Et armatur iaculis.

3 a. O quam mira haec sophia,
O quam nova caeli via,
Vincit, qui occiditur!

3 b. Roma necat Petrum cruce,
Paulum ense, et sic duce
Christo mundus vincitur.

4 a. Crucifigit per Aegeam
Patras occidens Andream,
Caedit Thomam India,

4b. Iacobum, natum Alphaei,
lacobumque Zebedaei
Et Mathiam Syria,

5 a. Aethiopia Matthaeum.

India Bartholomaeum,

Et Philippum Asia,

5 b. Simonem et Iudam Persa,
Barnabam Cyprus perversa,
Marcum Alexandria.

6 a. Iohannes in Asia,
Lucas in Bithynia
In pace migrarunt,

6 b. Uni Deo gloria,
Cuius pro victoria
Sancti triumpharunt.

7 a. Et vos patres, veris bonis
Locupletes, caeli donis,
Apud thronum gratiae

7 b. Intercedite pro nobis,
Ut consortes simus vobis
Coheredes gloriae.