353. De uno Martyre.

1 a. Benedictus rex sanctorum,
Qui sacravit invictorum
Martyrum sollemnia,

1b. In quo gaudet nubes Dei,
Qui praesentis nos diei
Perlustrat laetitia.

2 a. Iste suam tulit crucem

Vir secutus Christum ducem
In magna constantia.

2 b. Hic athleta velut gemma
Ornans regis diadema
Lucet in ecclesia.

3 a. Hic est lapis pretiosus,
Christi martyr gloriosus,
Quem non terret gladius,

3 b. Gemma rubei coloris,
Rubet intus, rubet foris
Verus ille sardius.

4 a. Rubet intus per affectum,
Rubet foris per effectam
Rosei martyrii,

4 b. Corde flagrans per amorem
Corpus offert per odorem
Veri sacrificii.

5 a. Quid est satan, quod dixisti,
Cum pro pelle docuisti
Pellem dare hominis?

5 b. Pellis pelle commutatur,
Dum pro terra quis lucratur
Caelum damno sanguinis.

6 a. Sic pro vita permansura
Vita transit peritura,
Dum vir iustus tollitur,

6b. Sic pro pelle gloriosa
Datur pellis vitiosa,

Dum haec vita spernitur.

7 a. O beate caeli civis,

Qui post mortem vita vivis,
Quae non habet terminum,

7 b. Adclamantes tuae laudi

Voces nostras clemens audi
Et exora Dominum,

8 a. Ut peccati pulsa mole
Ac infuso vero sole
Nostris insit mentibus,

8 b. Corda nostra tollat sursum
Et post huius vitae cursum
Caeli iungat civibus.