355. De Martyribus.

1 a. Dulci sono melodiae
Resonemus in hac die
Laudes regi gloriae,

1 b. Cuius ope sancti viri
Meruerunt redimiri
Corona victoriae.

2 a. Hi calcata mundi vita
Pro inventa margarita
Tradiderunt corpora,

2b. Hi de regno Pharaonis
Rubra suae passionis
Transierunt aequora.

3 a. Hi sunt pelles rubricatae
Ad ornandum coaptatae
Legis tabernaculum,

3b. Pelles veri Salomonis,
Quibus suae mansionis
Ornat habitaculum.

4 a. Sic in templo micant isti,
Ut in horto sponsae Christi
Florent mala punica;

4 b. Isti sunt malagranata,

Qui in summo sunt locata
Sacerdotis tunica.

5 a. O felices et beati,

Iam a Christo sublimati,
Prima stola trabeati
In caelesti curia ;

5 b. Nobis prece subvenite,

Ut post huius cursum vitae
Per beatum nos ''Venite
''Christi vocet gratia.