Thomas Aquinas, In IV Sententiarum – In Libros Sententiarum

Quia pejus est contemnere christum quam contemnere sacramentum christi. Sed fidelis peccator manducans contemnit christum, quem sub sacramento vere esse credit; infidelis autem contemnit sacramentum in hoc quod sub eo christum esse non credit. Ergo infidelis minus peccat.

Argumentum 2

Praeterea, quanto aliquod peccatum est magis dissonum a ratione, tanto est gravius. Sed peccatum fidelis indigne sumentis est contra rationem naturalem manifeste: non autem illius qui non credit sub hoc sacramento christum secundum veritatem esse: quia hoc supra rationem est, et supra sensum. Ergo infidelis minus peccat.

Argumentum 3

Sed contra, quanto aliquis magis elongatur a christo realiter, tanto magis debet elongari sacramentaliter.

Sed infidelis magis elongatur realiter: quia prima unio ad christum est per fidem, qua ille caret. Ergo magis peccat accedendo ad christum sacramentaliter.