Thomas Aquinas, In IV Sententiarum – In Libros Sententiarum

Ulterius. Videtur quod etiam virtute hujus sacramenti dimittantur mortalia. Dicitur enim in collecta illa: purificent nos, quaesumus domine, sacramenta quae sumpsimus; et mox: praesta ut hoc tuum sacramentum sit ablutio scelerum. Sed scelera dicuntur mortalia peccata. Ergo delet peccata mortalia.

Argumentum 2

Praeterea, hoc sacramentum expressius passionem christi repraesentat quam baptismus. Sed baptismus virtute passionis in eo operantis delet peccata mortalia. Ergo et hoc sacramentum.

Argumentum 3

Praeterea, minima gratia sufficit ad delendum omnia mortalia. Sed hoc sacramentum gratiam confert. Ergo mortalia delet.

Argumentum 4

Praeterea, hoc sacramentum magis operatur in sumente quam in alio; alias frustra quis assumeret.

Sed offertur sacrificium ecclesiae pro aliquibus impiis ut convertantur, et non frustra. Ergo et in ipso qui sumit, mortalia peccata delet.

Sed Contra 1

Sed contra, Augustinus ad renatum: quis offerat corpus christi nisi pro his qui sunt membra christi? sed illi qui sunt membra christi, non habent peccatum mortale.

Ergo virtute hujus sacramenti non delentur mortalia.

Sed Contra 2

Praeterea, hoc sacramentum non habet aliquem effectum in indigne accedentibus. Sed quicumque accedit cum mortali, indigne accedit. Ergo non percipit effectum hujus sacramenti; et ita non delet mortalia.