Thomas Aquinas, In IV Sententiarum – In Libros Sententiarum

Sed albedo non est hic sine subjecto: quod patet ex hoc quod dividitur per accidens, quod non competit nisi existenti in subjecto. Ergo nec quantitas aut aliquod accidens est hic sine subjecto.

Argumentum 2

Praeterea, illud quod sensus percipit in hoc sacramento, est ibi secundum veritatem; alias esset fictio in hoc sacramento. Sed sensus non tantum percipit ibi quantitatem aut albedinem, sed etiam quantum et album. Ergo non est ibi accidens sine subjecto.

Argumentum 3

Praeterea, accidens non individuatur nisi ex subjecto, sicut nec forma nisi ex materia. Sed accidentia sunt ibi individuata; alias non essent sensibilia.

Ergo non sunt sine subjecto.

Argumentum 4

Praeterea, omnis forma separata a materia est intellectus in actu, ut a philosophis probatur.

Sed si accidentia sunt hic sine subjecto, erunt quaedam formae sine materia: non enim habent materiam partem sui. Ergo erunt intellectus in actu, quod falsum apparet.

Argumentum 5

Praeterea, quanto aliquid appropinquat ad divinam simplicitatem, tanto est simplicius. Sed si sunt haec accidentia sine substantia, magis appropinquant ad divinam simplicitatem quam Angeli: quia in Angelis est compositio, ad minus ex quo est et quod est; quae in his accidentibus inveniri non potest. Ergo erunt nobiliora Angelis; quod falsum est.

Argumentum 6

Praeterea, impossibile est densitatem esse sine materia, neque raritatem: quia haec est definitio densi, quod multum de materia contineatur sub parvis dimensionibus; et contraria est definitio rari. Sed tactus percipit in hoc sacramento densitatem.

Ergo est ibi materia sub dimensionibus; ergo dimensiones non per se existunt, et ita nec alia accidentia.

Sed Contra 1

Sed contra: sicut, in praecedenti dist., dictum est, ibi non est alia substantia quam corporis christi.

Sed non sunt accidentia quae apparent, in corpore christi sicut in subjecto, quia non determinant ipsum. Ergo non sunt in subjecto aliquo.

Sed Contra 2

Praeterea, species ad hoc remanent in sacramento, ut ducant per significationem in corpus christi. Sed si essent in aliquo sicut in subjecto, non ducerent in corpus christi, sed magis in cognitionem sui subjecti. Ergo sunt hic accidentia sine subjecto.