Thomas Aquinas, In IV Sententiarum – In Libros Sententiarum

Omnis enim virtutis actus est meritorius. Sed satisfactio non est meritoria, ut videtur; quia meritum gratuitum est; sed satisfactio debitum attendit.

Ergo satisfactio non est actus virtutis.

Argumentum 2

Praeterea, omnis actus virtutis est voluntarius.

Sed aliquando fit alicui satisfactio de aliquo, eo invito; ut quando aliquis pro offensa in alterum commissa a judice punitur. Ergo satisfactio non est virtutis actus.

Argumentum 3

Praeterea, secundum philosophum, in virtute moris principale est electio.

Sed satisfactio non fit per electionem, sed respicit principaliter exteriora opera. Ergo non est virtutis actus.

Sed Contra 1

Sed contra, satisfactio ad poenitentiam pertinet.

Sed poenitentia est virtus, ut prius dictum est.

Ergo satisfactio est actus virtutis.

Sed Contra 2

Praeterea, nullus actus operatur ad deletionem peccati, nisi sit actus virtutis: quia contrarium destruitur per suum contrarium. Sed per satisfactionem peccatum totaliter annihilatur. Ergo satisfactio est virtutis actus.