Thomas Aquinas, In IV Sententiarum – In Libros Sententiarum

Ulterius. Videtur quod ignis Purgatorius non liberet a reatu poenae. Omnis enim purgatio respicit foeditatem. Sed poena non importat aliquam foeditatem. Ergo ignis Purgatorius non liberat a poena.

Argumentum 2

Praeterea, contrarium non purgatur nisi per suum contrarium. Sed poena contrariatur poenae.

Ergo per poenam Purgatorii non purgatur aliquis a reatu poenae.

Argumentum 3

Praeterea, 1 corinth. 3, super illud: salvus erit, sic tamen etc., dicit Glossa vetus: ignis iste est tentatio tribulationis, de qua scriptum est: vasa figuli probat fornax; Eccli. 27, 6. Ergo homo expiatur ab omni poena per poenas hujus mundi saltem per mortem, quae est maxima poenarum, et non per Purgatorium ignem.

Sed Contra 1

Sed contra, poena Purgatorii est gravior quam poena quaelibet hujus mundi, ut supra dictum est.

Sed per poenam satisfactoriam, quam aliquis in hac vita sustinet, expiatur a debito poenae. Ergo multo fortius per poenam Purgatorii.