Thomas Aquinas, In IV Sententiarum – In Libros Sententiarum

Ulterius. Videtur quod votum non sit tantum de meliori bono. Quia illud quod est necessitatis, non reputatur bonum melius, sed commune bonum. Sed de eo quod est necessitatis, potest esse votum, sicut Jacob, Gen. 27, vovit quod esset sibi dominus in deum. Ergo non oportet quod sit de meliori bono.

Argumentum 2

Praeterea, vota quaedam fiunt de rebus indifferentibus, sicut mulieres praecipue solent vovere quod non pectinent caput tali vel tali die.

Sed indifferentia non includuntur in bonis melioribus.

Ergo votum non est semper de bono meliori.

Argumentum 3

Praeterea, illud quod est illicitum, non est bonum, ne dum ut sit melius. Sed de illicito potest esse votum, sicut patet de jephte, qui propter votum occidit filiam innocentem, qui, ut dicit Hieronymus, in catalogo sanctorum ponitur; quia placuit deo animus voventis. Ergo votum non est semper de meliori bono.

Argumentum 4

Praeterea, meliora bona videntur illa esse de quibus est consilium. Sed de illis qui possunt vergere in periculum personae, non est consilium, quae tamen quidam vovent, sicut quod abstineant duobus vel tribus diebus a cibo, quod sine periculo personae sustinere non possunt. Ergo votum non est semper de meliori bono.

Sed Contra 1

Sed contra est definitio voti prius posita, scilicet: votum est promissio melioris boni ex deliberatione firmata.