Thomas Aquinas, In IV Sententiarum – In Libros Sententiarum

Ulterius. Videtur quod delectatio et gaudium sint penitus idem; et similiter exultatio et laetitia et jucunditas. Passiones enim et habitus penes objecta distinguuntur. Sed gaudium et delectatio et alia dicta, habent idem objectum, scilicet bonum conveniens. Ergo sunt idem.

Argumentum 2

Praeterea, ab eadem causa procedit idem effectus; quia idem semper natum est idem facere.

Sed delectationis et gaudii non potest poni nisi una et eadem causa, scilicet conjunctio convenientis.

Ergo sunt idem.

Argumentum 3

Praeterea, unum uni opponitur. Sed delectationi et gaudio opponitur unum, quod est tristitia.

Ergo delectatio et gaudium sunt unum omnino.

Sed Contra 1

Sed contra est quod dicit Avicenna in 6 de naturalibus, quod gaudium est species delectationis. Ergo non sunt omnino idem.

Sed Contra 2

Praeterea, si gaudium et delectatio essent omnino idem, ubicumque est delectatio, esset et gaudium.

Hoc autem falsum est: quia in sensu dicitur esse delectatio, sed non gaudium, proprie loquendo.

Ergo delectatio et gaudium non sunt penitus idem.