Acta Benedicti Pp. XVI 451

III

Venerabili Dei Servo Zoltano Ludovico Meszlényi caelitum Beatorum tribuitur

dignitas.

BENEDICTUS PP. XVI

Ad perpetuam rei memoriam. - «Dico autem vobis: Omnis, quicumque

confessus fuerit in me coram hominibus, et Filius hominis confitebitur in

illo coram angelis Dei » (Lc 12, 8).

Dei Servus Zoltanus Ludovicus Meszlényi, Episcopus et martyr, propter

invictae fidei testificationem coram hominibus, strenua cruentaque Ecclesiae

aversatione oppressus est, quam communistarum in Hungariam dominatus

intulerat.

In pago Hatvan prope Budapestinensem urbem die II mensis Ianuarii

anno MDCCCXCII ortus est. Eximio praeditus ingenio, cultum humanitatemque

ubertim est consecutus. Classicis curriculis apud Benedictinorum lyceum

absolutis, mense Iunio Romam missus est, ut, Collegii Germanici-Hungarici

alumnus, altiorem institutionem in studiorum Universitate Gregoriana

adipisceretur. Primo mundano bello saeviente, Collegium Oenipontanam in

urbem est traslatum, ubi die XXVII mensis Octobris anno MCMXV diaconus et

postridie sacerdos est renuntiatus. Hungariae Primas eum cappellanum no-

minavit apud pagum Komáron, porro, suas propter claras ingenii dotes item-

que humanam culturalemque institutionem, complura munia recepit, sibi

superiorum sociorumque concilians aestimationem. Mense Ianuario anno

MCMXXXI Cardinalis Iustinianus Serédi eum protonotarium archiepiscopalem

abbatialemque nominavit; iudex praeterea fuit prosynodalis primatialis Sedis

atque anno MCMXXXIV liber doctor renuntiatus est apud Iuris Academiam.

Magni momenti haec officia minime effecerunt ut Dei Servus se extolleret

atque fervorem amitteret. Eius dotibus agnitis, cum Episcopus Auxiliaris

Strigoniensis esset eligendus, quod munus vacaverat inde ab anno MCMXXXIII,

die XXVIII mensis Octobris anno MCMXXXVII Episcopus est consecratus. Mense

Septembri eiusdem anni Venerabilis Dei Servus munus quoque recepit Vicarii

Apostolici provinciarum ecclesiasticarum Cassoviensis et Rosnaviensis. Anno

MCMXL Hungariae Primas, Cardinalis Iustinianus Serédi, eum doctorem

destinavit et studiorum Universitatis Budapestinensis praepositum. Sed

iam libertatis Hungaricae Ecclesiae tempus abiturum erat. Post enim