Acta Apostolicae Sedis - Commentarium Officiale288

Ceterum Dei Famulus, quippe quem nec animi lenitas neque caritas um-

quam deficeret, dum quam plurimos e grege sibi concredito evangelica luce

illustraret, dum eosdem ad summam hominum dignitatem proveheret, nec

suis privatis opibus nec suopte quidem labori umquam pepercit. Talis ergo

christianae virtutis heros in variis vitae suae adiunctis plane sacerdotem se

praebuit: candida enim, qua ipse pollebat, pietas, assidua exculta precatione,

ad industriam et caritatem redibat. Quin etiam vir Dei fortissimus, eximia in

Sacratissimam Eucharistiam innixus religione, Christi vultum in quolibet

homine agnoscere valebat, et maxime in aegris in iisque omnibus qui aerum-

nis, vel aliis angustiis quibuscumque, affligerentur.

Cum autem Ioannes, anno 1934, episcopalem sedem, Prisriana motam,

Scopiam transtulisset, anno 1938 dioecesanae Synodo interfuit, quae nona

quidem eius Dioecesi, ipsi vero novissima fuit: iampridem enim graviter ae-

grotabat, praesertim ex assiduo dolore capitis, eoque magis magisque ingra-

vescenti. Incomitatus tamen cum postremum Labacum iter fecisset, multis

cum Episcopo eius urbis habitis colloquiis, ibidem pientissime requievit die 3

mensis Februarii, anno 1939 (erat enim feria sexta dies ille, prima eius men-

sis); triduoque post, facto ei sollemni funere in Labacensi templo, Deo et

Sacratissimo Cordi Iesu dicato, in coemeterio Sanctae Crucis (S. Kriz vulgo

dicunt), inter defunctos Vincentianos sodales, sepultus est, cum interim ephe-

meris quaedam, in eius regionis vulgus proposita, « Sanctum Episcopum »

obiisse nuntiaverat.

Increbrescente igitur eiusmodi sanctimoniae fama, in Curia Labacensi

Cognitionalis Processus, a die 25 mensis Ianuarii anno 1978 ad diem 30

mensis Iulii anno 1984, in Curia vero Scopiensi-Prisrianensi Rogationalis

Processus, a die 26 mensis Maii anno 1979 ad diem 27 mensis Maii anno

1983, instituti sunt; quorum et singulorum vim Processuum Congregatio de

Causis Sanctorum ratam fecit per decretum die 2 mensis Maii anno 1986,

latum. Positione confecta, more tralaticio disceptatum est num Dei Famulus

christianas virtutes, ipseque heroicum in modum, exercuisset. Die autem 3

mensis Aprilis anno 2009, felici quidem cum exitu, habitus est Congressus

Peculiaris Theologorum Consultorum. Amplissimus denique Purpuratorum

Patrum et Antistitum coetus, in Comitiis Ordinariis, quae die 9 mensis Fe-

bruarii vertente anno 2010, gesta sunt, audita relatione Exc.mi D.ni Marcelli

Semeraro, Episcopi Albanensis, Causae Ponentis, agnovit Dei Famulum

theologales, cardinales iisque adnexas virtutes, heroicum quidem in modum,

exercuisse.