Acta Apostolicae Sedis - Commentarium Officiale296

Parentibus praemature orbata, Serva Dei, licentia scholae primariae

adepta, Collegium Sororum Ursulinarum Coloniae Agrippinae annum fere

frequentavit, quo tempore vero in iuvenis Reginae Christinae Gulielminae

animo initia vocationis religiosae eminere coeperunt. Desiderium sese omnino

Domino consecrandi perficere pluribus autem praepedita rationibus, fervens

suiipsius oblationis studium utique colere conata est. Quapropter una cum

amicis Collegii carissimis quibusdam « Congregationem Marialem » operibus

caritatis et orationi deditam fundavit.

Anno 1851 votum perpetuae castitatis emisit et Tertii Ordinis Sancti

Francisci facta est membrum, nomen sumens religiosum Mariae Teresiae.

Deinde, anno 1859, una cum duabus religiosis ex Sororibus a Divina Caritate,

scilicet Regina Loeser et Clara Pfänder, in civitate sua natali Congregationem

Sororum Sancti Francisci Filiarum Sacratissimorum Cordium Iesu et Mariae

condidit, in qua nomen suum in Mariam Teresiam a Sanctissimo Sacramento

postremum mutavit.

Nova haec Congregatio, licet cum spiritualitatis Sancti Francisci placitis,

quae Servae Dei dilectissima erat, ad amussim congrueret, Regulam tamen

Sancti Augustini servavit, quam Soror Clara Pfänder, prima nominata Su-

periorissa Generalis, in redigendis Statutis potissime excerpsit. Hanc ob rem

adeo dissensiones innumerae processerunt, ut Superiorissa Domum Matrem,

Olpae iam constitutam, Saliscottum transferre persuaderetur et maximam

quidem religiosarum partem secum devehere.

Soror Maria Teresia, quae Olpae restiterat, etsi inter aerumnas, omnimo-

do contendit, ut ardentem profundamque contemplationis vitam adorationis

perpetuae virtute intra parvae suae communitatis parietes suscitaret, quam

vero iamiam religiosarum exiguitatis causa desiit. Mense Iulii anni 1863,

autem, Episcopus Paderbornensis, Excellentissimus Dominus Conradus

Martin, de tantis vicissitudinibus certior factus, Conventuum Olpensis et

Saliscottensis statuit seiunctionem et duas Congregationes indipendentes

pronuntiavit, biennio post nova approbans Statuta, quae Serva Dei, utpote

Superiorissa Generalis, iuxta dilectam atque optatam Regulam Tertii Ordinis

Sancti Francisci composuit. Hoc novum Institutum nomine Pauperum

Sororum Sancti Francisci ab Adoratione Perpetua nuncupatum est, continuo

eucharistico cultui, pauperum derelictorumque infantium subsidio atque

infirmorum curae domi ministrandae peculiariter addictum.

Soror Maria Teresia ipsa, nunc Superiorissa, religiosarum provectui omni

ope favit et cum unaquaque earum genuinam consuetudinem et solidum