Ekkehartus, Decanus Sancti Galli, d. 973.
204. (1. ) De sanctissima Trinitate.
205. (2. ) De sancto Benedicto.
206. (3. ) De sancto Columbano.
207. (4. ) In Decollatione s. Iohannis Bapt.
1. Qui benedici cupitis,
2 a. Huc festini currite, Benedicti patris opem quaerite,
2 b. Terrena spernite, ad poli gaudia mentes tendite,
3 a. Quo vir inclitas iste certissimam monstravit semitam,
3 b. In quo nil nisi pia simplicitas ac norma radiat.
4 a. Hic iam a primo flore et annis teneris maturis moribus senectam possidens,
4 b. Cunctas lascivae carnis illecebras domans, hagio pneumati se vas exhibuit.
5 a. Quantas Deo animas lucratus fuerit, Dominus numerat et hostis ingemit,
5 b. Cuius novas naenias et crudelissima proelia caelitus suffultus straverat.
6 a. Iste calicem
letali potu spumidum
eminus
misso signo crucis
ceu saxo iacto fregerat.
6 b. Persequentium
ruinas dolet ut David,
opera
absentum spiritu
cognoscit Helisaico.
7 a. Ut sacer Moyses de rupe fluvium precibus elicit, ferrum natare praecipit.
7 b. Ut Petrum Dominus, sic Maurum currere fecerat pelagus, physin per fidem superans.
8 a. Orbati patris luctum abstersit defuncto vitae reddito.
8 b. Collectum mundi globum nocte ceu sub solis iubare vidit.
9 a. Diu praescriptum beati sui transitus
9 b. Diem praenoscens
signavit caris fratribus.
10 a. Obeunte eodem
quidam pulcherrimam viderant viam,
10 b. Per quam illis est dictum Benedictum patrem caelos advectum,
11 Quo sequi
nos donet Christus.