167. (2. ) Oratio ad Christum altera.

1. Spes mea, Christe, Rex benedicte, Lux pia vitae Duxque perite, Pastor amande Seu venerande.

2. Summe creator Et reparator, Sis mihi factor Semper et auctor, Sis animator Et recreator.

3. Tu iugis esto Gloria servo, Perpes alumno Vita misello, Semper adesto, Rex pie, voto.

4. Respice flentem, Quaeso, clientem, Te metuentem Atque petentem, Te venerantem, Quin et amantem.

5. Porrige dextram, Erige vernam, Exue multam, Postulo, culpam, Corrige vitam Tu male tritam.

6. Tolle ruborem, Mitte pudorem, Pelle pavorem, Funde nitorem. Velle rigorem Daque vigorem.

7. Necte timorem, Quin et amorem, Posco, perennem Per genitorem, Qui regit omnem Fortiter orbem.

8. Semper ubique, Christe, tuere Et mihi, celse, Tu miserere Daque timere Atque amare,

9. Per tua, sancte, Scripta meare, Corde vel ore Hinc peragrare, Perpete mente Hinc recitare.

10. Da meditari Et modulari. Ore profari, Corde operari Et tibi regi Da famulari.

11. Haec ego verbi Munere summi Atque corusci Posco adipisci, Pressus enormi Mole piacli.

12. Christe, clienti Consule flenti Et, precor, audi Vota miselli, Unice fili Patris amandi.

13. Sedula dulci Laus genitori Et tibi proli Flamini et ipsi, Perpes et uni Laus deitati.