48. (1. ) Oratio. Carm. IV.

Omnipotens genitor, rerum cui summa potestas, Exaudi, si iusta precor; ne sit mihi tristis Ulla dies, placidam nox rumpat nulla quietem, Nec placeant aliena mihi, quia et mea prosint 5 Supplicibus, nullusque habeat mihi vota nocendi Aut habeat nocitura mihi, male velle facultas Nulla sit ac bene posse assit tranquilla potestas. Mens contenta suo nec turpi dedita lucro Vincat corporeas casto bene conscia lecto

10 Illecebras, turpesque iocos obscenaque dicta Oderit illa nocens et multum grata malignis Auribus effuso semper rea lingua veneno. Non obitu adfligar cuiusquam aut funere crescam, Invideam nunquam cuiquam nec mentiar unquam.

15 Assit laeta domus epulisqne alludat inemptis Verna satur fidusque comes nitidusque minister Morigera et coniunx caraque ex coniuge nati. Moribus haec castis tribuit Deus, hi sibi mores Perpetuam spondent ventura in saecula vitam.