229. (1. ) In Assumptione Beatae Mariae.

1. Adest dies laetitiae, jucundus omni lumine, In quo regina virginum Scandit iter astriferum.

2. Angelorum praefulgidis Circumvallata cuneis, Quamque sanctarum virginum Sequitur agmen inclitum.

3. Ut decet omnes credere, Caelesti diademate Clarus occurit obvius Christus ex ea genitus.

4. Ultra angelorum gloriam Thorum delicti nescium Secum ad patris solium Reportat pignus optimum.

5. Caelestis regni civitas Et eius omnis dignitas Parentem sui principis Votis honorat congruis.

6. Cum quibus nos laetissima Huius diei gaudia Concelebremus alacres Deum laudando supplices.

7. Huius festi clarissima Prosequamur praeconia Mentis affectu supplices, Effectu vocis alacres.