232. (4. ) In sancti Maioli.

In 1. Vesperis.

1. Victoris agni sanguine Dies sacratus hodie, Fusus supremo lumine, Gemina pollens lampade.

2. Ecce, paschale gaudium Fulget per omne saeculum ! Magni Maioli transitum, Vitam simul et meritum

3. Pangat clerus et populus, Maxime grex monasticus, Quo nil habuit dulcius, Dum esset terris positus.

4. Praecedit Christus patiens, Maiolus illum confitens Sequitur recto tramite, Dei praeventus munere.

5. Patriarcharum solidam Fidem opere coluit, Quod chorus vatum cecinit, Fideli fide credidit.

6. Ordinis apostolici

Sectando sacra dogmata Factus est pater inclitus Ipse vir apostolicus.

7. Cuius clara confessio Coronatur martyrio Decertando legitime Subacto mundi principe.

8. Templum ipse virgineum Pectus sacravit proprium, Caelestis vitae nuntius Recte vocatur angelus.

9. Quorum gaudet nominibus Pater noster egregius, Hic nos iungat in aethera Christi favente gratia.

10. Tibi sit laus et gloria Tollenti mundi crimina Cum patre et sancto spiritu In sempiterna saecula.