235. (7. ) In sancti Maioli.

In 2. Vesperis.

1. Christe, cunctorum pariter tuorum Palmitum vitis, Deus alme, nobis Praebe Maioli celebrare tanti Festa patroni.

2. Quem tibi nostris placuit diebus Pluribus signis meritisque dignis Regibus coram hominumque turmis Glorificare.

3. Annuas istisque sic interesse Gaudiis nos perpetuis et almis, Pro reis gestis merito carere Ut nequeamus.

4. Quaesumus, rector, pietatis auctor, Noster hic pastor tibi sit precator, Quo tua nobis pietate cunctis Crimina dones.

5. Cuius in tanto pia vota festo Congruit nobis iugiter canendo, Insuper Paschae tibi duplicatas Solvere laudes.

6. Trinitas, unus Deus atque summus, Sit tibi, rex, gloria sempiterna, Qui regis tanta bonitate cuncta Omne per aevum.