67. (2) Hymnus in Honore sanctae Crucis.

Carm. 1. II, n. 6.

1. Vexilla regis prodeunt, Fulget crucis mysterium, Quo carne carnis conditor Suspensus est patibulo.

2. Confixa clavis viscera Tendens manus, vestigia Redemptionis gratia Hic immolata est hostia.

3. Quo vulneratus insuper Mucrone diro lanceae, Ut nos lavaret crimine, Manavit unda et sanguine.

4. Impleta sunt, quae concinit David fideli carmine Dicendo nationibus: Regnavit a ligno Deus.

5. Arbor decora et fulgida, Ornata regis purpura, Electa digno stipite Tam sancta membra tangere,

6. Beata cuius brachiis Pretium pependit saeculi, Statera facta est corporis Praedam tulitque tartari.

7. Fundis aroma cortice, Vincis sapore nectare, Iucunda fructu fertili Plaudis triumpho nobili.

8. Salve, ara, salve, victima, De passionis gloria, Qua vita mortem pertulit Et morte vitam reddidit.

1, 3 carnem A.

Nach Str. 1. schieben IN ein;

Confixus clavis innocens

Mortem peremit (pervenit N) innocens

Saevum tyrannum vinciens

Et nos ab illo liberans.

7. O crux, ave, spes unica, Hoc passionis tempore, Auge piis iustitiam Reisque dona veniam.

8. Te, summa Deus trinitas, Collaudet omnis spiritus, Quos per crucis mysterium Salvas, rege per saecula.