XII.

Dominica in Quinquagesima,

ORATIO.

Assumpsit Jesus duodecim Discipulos '.

Domine Jesu Christe, qui tendentes et ascendentes Jerosolimam perducis et consummas per crucis ignominiam, ignosce mihi, o summa munditia, quod ego corpus tuum indigne sumendo toties tradidi te libidinosis motibus meis, tamquam incircumcisis gentibus : ignosce mihi, o summa veritas, quod ego toties illusi tibi votum meum transgrediendo, et proximis meis mentiendo : ignosce mihi, o vera patientia, quod toties flagellavi te, peccata mea iterando, et te offendendo : ignosce mihi, o summa sapientia, quod ego toties faciem tuam conspui, quando veritatis cognitionem quam de te habui, per turpitudinem vitae meae foedavi: ignosce mihi, o vera vita, quod ego toties te occidi, quando per peccatum mortale te ab anima mea repuli : et fac me tertia die resurgere per veram et firmam contritionem, puram confessionem, condignam satisfactionem : da mihi appropinquare Jericho, considerare scilicet defectus meos, cum sim caecus in rationali, mendicus in concupiscibili, remissus sedens in irascibili : non me increpet temporalium rerum turba praeteriens, ut a laude tua taceam, sed potius stans indicans te mihi ut respiciam dona tua, et peccata mea, et videam te verum lumen et sequar, magnificans et laudans cum omni populo. Amen.