XXVI

In die Pentecostes,

ORATIO.

''Si quis diligit me .

Domine Jesu Christe, da nobis Spiritum sanctitatis, illuminationis, consolationis, et unitatis ; contra immunditiam, ignorantiam, miseriam, et discordiam, quas per peccatum primorum parentum contraximus : qui suo igne nos purget, illuminet, foveat, et uniat : ut te diligamus in voluntate, et sermonem tuum, non mundi, carnis, vel diaboli, servemus in opere : ut tu sapientia cum Patris potentia, et Spiritus bonitate ad nos venias. Sancta Trinitas faciat sibi mansionem in anima nostra, Deus Pater tabernaculum, Filius domum dispensationis, Spiritus sanctus templum sacrificii et orationis. Deus Pater, mitte nobis Paraclitum in nomine Filii tui qui nos filios efficiat adoptionis : et quascumque locutus, vel operatus es in nobis per Filium tuum verbo, vel intellectu, confirmet in opere, et suggerat in affectu. Da nobis pacem aeternitatis et conscientiae: ut non turbetur cor nostrum per sollicitudinem de temporalibus acquirendis, vel per dolorem de amissis, neque formidet per timorem de adversis. Domine Jesu Christe, sicut dignatus es nobis verbo inspirare et exemplo, Vado et venio : vade ad Patrem per actionis potentiam, veni ad nos per contemplationis sapientiam, in qua princeps sapientis hujus mundi non habet quidquam, quae consistit tantum in superfluitate verborum ; ut sicut mandatum per te dedit nobis Pater, sic per te faciamus. Amen.