XX.

Dominica in octavis Paschae,

ORATIO.

Cum sero esset die illo .

Domine Jesu Christe, da mihi in die cognitionis sero humilitatis, integritatem unitatis, et sabbatum internae quietis : claude fores exteriores, visum contra vanitatem, auditum contra verbositatem, olfactum contra voluptatem, gustum contra edacitatem, tactum contra foeditatem et impuritatem : et fores interiores, memoriam contra oblivionem, rationem contra errorem, voluntatem contra invidiam, affectionem et intentionem rectam contra pravitatem, utilitatem contra humanum favorem propter metum daemonum : ut discipuli, virtutes congregentur in unum : veni, ut visites: sta, ut corrobores : dic, ut erudias. 0 summum gaudium, veni ut consoleris pusillanimes. 0 summa virtus, sta ut sustentes debiles et infirmos. 0 summa sapientia, dic ut erudias erroneos et imperitos. Ostende nobis manus, invitans nos ad operationem bonorum, latus ad patientiam malorum. Gaudeant discipuli tui viso te Domino, et congaudeant resurgenti proximo. Sicut misit te Pater, mitte nos in sapientia et bonitate. Sicut inspirasti nobis vitam naturalem, infla et spiritualem. Antequam exerceamus potestatem remissionis peccatorum, appareat in opere manuum no- strarum fixura clavorum, dolor de damno peccati, pudor de turpitudine, timor de poena, poenitentia in gustu et habitu, et elongatio ab omni occasione et opportunitate peccandi : ut proximus mittens manus in vulnus lateris, imitetur in nobis affectum compassionis. Amen.