XXVIII.

Dominica prima post festum Trinitatis,

ORATIO.

Homo quidam erat dives qui induebatur, etc. '.

Domine Jesu Christe, cum sim homo pauper virtutibus, plenus peccatorum ulceribus, mendicus ad januam tuae misericordiae : cupiens saturari de micis tribulationum quae cadunt de mensa divitum filiorum tuorum, qui induuntur purpura passionum castarum affectionum, et epulantur quotidie splendide ferculis virtutum : veniant canes, Doctores tui, et lingant ulcera peccatorum meorum, ut moriens mundo deporter ab Angelis bonorum operum in sinum contemplationis. Mitte Lazarum, adjutorium gratiae tuae, ut intingat saltem extremum digiti operum meorum in aquam verse contritionis, ut refrigeret carnem meam, quia crucior in hac concupiscentiarum flamma. Testetur quinque sensibus meis, ne ipsi veniant in locum gehennalium tormentorum, sed audiant Moysen, declinando a malo et faciendo bonum, et Prophetas, quia tunc sperabunt vitam aeternam, cum ex mortuis resurgent, se habituros. Amen.