Thomas Aquinas, In IV Sententiarum – In Libros Sententiarum

Ulterius. Videtur quod haec virtus non sit in sacramentis a passione christi. Christus enim, secundum quod homo, non dat spiritum sanctum, neque gratiam causat, ut in 1 Lib., dist. 14, qu. 3, art. Unic., dictum est. Sed passio convenit ei secundum quod homo. Ergo efficacia virtutis quae est in sacramentis ad gratiam causandam, non potest esse a christi passione, sed ab ejus divinitate.

Argumentum 2

Praeterea, Rom. 4, 25, dicitur, quod resurrexit propter justificationem nostram. Sed justificatio fit per infusionem gratiae. Ergo magis a resurrectione sacramenta praedictam virtutem habent.

Argumentum 3

Praeterea, sacramenta dicuntur a fide efficaciam habere. Sed fides non solum est de passione sed etiam de aliis articulis. Ergo non solum a passione efficaciam habent.

Sed Contra 1

Sed contra, Rom. 5, super illud: similitudinem praevaricationis Adae, dicit Glossa: ex latere christi profluxerunt sacramenta per quae salvata est ecclesia. Hoc autem factum est in passione.

Ergo ex passione efficaciam habent.

Sed Contra 2

Praeterea, sacramenta sunt medicinae contra peccata. Sed peccata sunt ablata per christi passionem; quia mortuus est propter delicta nostra: Rom. 5. Ergo a passione efficaciam habent.