Thomas Aquinas, In IV Sententiarum – In Libros Sententiarum

Ulterius. Videtur quod debeat in magna quantitate apponi. Quia quod non est, non potest aliquid significare. Sed quod corruptum est, non est. Cum ergo aqua ponatur ad significandum, ut dicitur, videtur quod debeat tantum apponi quod non corrumpatur; et ita tantum quantum de vino vel plus, quia vinum est magis activum.

Argumentum 2

Praeterea, de latere christi sicut sanguis, ita et aqua sensibiliter fluxit. Sed si parum de aqua poneretur, non posset sentiri. Ergo debet in majori quantitate apponi.

Argumentum 3

Praeterea, si sufficit in parva quantitate aquam apponi, eadem ratione sufficeret ad sacramentum, si gutta aquae in totum dolium projiceretur.

Sed hoc videtur ridiculum. Ergo non sufficit quod parva quantitas ponatur.

Argumentum 4

Praeterea, quorumdam consuetudo esse dicitur in terris ubi non crescit vinum, quod pannum vino rubeo intinctum et siccatum aqua lavent; de qua cum ruborem vini acceperit, sanguinem christi conficiunt. Ergo videtur quod aqua in magna quantitate possit apponi.

Sed Contra 1

Sed contra, illud quod est ex duobus, neutrum illorum est, ut Damascenus dicit.

Sed si magna quantitas aquae apponeretur, esset quaedam mixtio. Ergo non esset vinum; et ita non posset inde sanguis christi confici.

Sed Contra 2

Praeterea, oportet quod aqua consumatur a vino ad hoc quod ex parte sanguinis sit tantum una species, sicut ex parte corporis. Sed non posset consumi, si aqua in magna quantitate poneretur.

Ergo non debet in magna quantitate poni.